Kierchtuerms­promenaden

En Tour duerch d 'Lëtzebuerger Land mam Tessy Glodt

Aasselbur

 

Dem Naturmusée seng Kartographie vun 2005 weist Schiefergrouwen zu Aasselbur. Hirer Leeën decken den Daach vun der Stater Häerz-Jesu Kierch; mä zum Opbau vun den zerstéierten Éisleker Dierfer konnte si an d‘Maartelenger zesummen no der Rundstedtoffensive net genug Leeë liwweren. Aasselbur gehéiert vun 1977 un zur Gemeng Wëntger, déi vum Terrain hier di gréisst, mä eng vun de mannst bewunnten aus dem Norde vum Land ass. D'Liewen gëtt de Leit vun do Aufgaben déi hirem Talent entspriechen. A schéngen dës Tâchen emol extra schwéier, da suergen se fir eng nei Experienz…

De kulturelle Weeweiser „Das alte Luxemburg heute“ weist op der Aasselburer Kierch hire spéitgotesche Chouer mat iwwerhéitem Daach hinn. Säin Alter datéiert en op d'Enn vum 15. Joerhonnert. Kuckeswäert si säi Kräizrëppeverwëllef mam schéine Schlusssteen mam hellge Péitrus an zwou konschtvoll al romanesche Figuren un de säitleche Säilenenner. A ganz imposant ass de Barock-Altor vun 1708 vum Baschtnecher Bildhauer Johann Tossing oder Toussaint. Vun him stinn ähnlecher am Stil, deen de Scholtus iwwerholl huet, zu St. Hubert, Housen a Munzen.

Asselborn oder "Aselburo" bestoung ewell an der Frankenzäit. Ufanks August 2012 huet et 374 Awunner gezielt an d‘Gemeng koum no un 4000. Si ass a 34 Joer ëm gutt 1000 Leit gewuess! D’Duerf läit 8 km vu Clierf un der "Éimeschbaach". Aselo bedeit op däitsch Assel an Éimes eng ‘Eidechs’. (Ob e Bezug besteet, do, zu deene klenge Krabbel- a Kräichdéiercher?) Säi Numm ass an enger aler Charte vu 1479 ze fannen. Geschwënn duerno hat de Seigneur vu Girsch e Petrus vun Asselborn als Geeschtlechen zu Thiaumont (Diedenberg) proposéiert. Eng speziell Bedeitung hat hei ëmmer d'Rousekranzpressessioun. Si geet op eng 1728 gegrënnte Brudderschaft zréck. An hir ware Laien, Geeschtlecher an Uerdensläit aus engem groussen Emkrees – vun den Ëlwener Patere bis bei d‘aadleg Housener Schwësteren. (Hir Membere hu missen an enger fir si bestëmmte Stonn am Joer déi 15 Rousekranzgesetzer an de Credo bieden an deen Dag zu de Sakramenter goën.)

Well ‘d'Duäref’ un engem Carrefour louch, huet et fréier méi eng grouss Roll gespillt wéi anerer ronderëm. Wie vun Antwerpen op Roum oder Neapel reese wollt, ass duerch Aasselbur gefuer! An… hei ass vu 1558 un d'Turn & Taxis-Postkutsch passéiert. En Unzéiungspunkt nobäi ass d'Aasselburer Millen, haut en Hotel-Restaurant. Si ass anengems och e Waassermillen- a Mëllermusée. Hiert Waasserrad funktionéiert just nach op Wonsch.

Zur Zäit vum Klëppelkrich war an dëser Géigend vill Onrou. De Michel Pintz, genannt "Schéifer Misch", an e groussen Deel vun der Populatioun hunn sech géint di franséisch Iwwerfäll gewiert. Herno sollt d‘Resistenz hien d'Liewe kaschten! D'Urteel hat geheesch: ‘Doud duerch Guillautine‘ bei der zerstéierter Glaciskapell! Dee couragéierte Misch war dat 28. Affer, 25 Joer al, an ass den 20. Mee 1799 higeriicht ginn! Säi 15järege Compagnon krut 20 Joer Prisong. Di zwee waren den 30.Oktober 1798 matschëlleg um "assassinat de deux gendarmes républicains". Am leschte Joerhonnert hunn d‘lëtzebuerger Auteure Michel Welter a Batty Weber aus deem Drama Bühnestécker geschriwwen. E Chronogramm vum Jean Steffen war 1999 fir de Bicentenaire vun der Executioun an der "Warte":

MIChaeL pIntzIVs aDVLesCens VT aIVnt VeraX fortIter LetIfera seCVrI obIIt. (LE JEUNE MICHEL PINTZ, SELON LA TRADITION UN ADEPTE INTRANSIGEANT DE LA VÉRITÉ, PASSA COURAGEUSEMENT DE VIE À TRÉPAS SOUS LE COUPERET MEURTRIER) - Manner opreegend ass eng Notiz aus dem Memorial vun 1891; hei steet, dass Aasselbur e Subsid vun 1000 Frang krut fir dat neit Paschtoueschhaus. (Originaltext aus de ‘Kierchtuermscauserien‘)